Mat 14 | NAS | STEP | Tenang eeꞌnang tee teie Eerotiꞌke, Kaaleliꞌnameng tarevukoꞌnunge Jiisuuꞌkoong doorenang taaravura aaꞌpuruꞌ bakaning bautarananka,

Matthew 14

Eerotiꞌke Jiisuuꞌ Tee Jooni Minkinara-pinaꞌ Daang noruꞌuuꞌnaꞌ

(Mak 6:14-29; Luk 3:19-20; 9:7-9)

1 Tenang eeꞌnang tee teie Eerotiꞌke, Kaaleliꞌnameng tarevukoꞌnunge Jiisuuꞌkoong doorenang taaravura aaꞌpuruꞌ bakaning bautarananka, 2 “Tee tee eeꞌnung Jooni Minkinara; booꞌketa napoꞌ daaꞌaring. Teeꞌkoo iriꞌ ninka mintoomparamaang.” 3 Tee tee eeꞌnunge Eerotiꞌke botoarioꞌ Jooni mooꞌura, daiꞌuuꞌ, eeꞌnoko kiimatanava-koo sipauꞌ Erodiasi dotu-anta-koo; 4 Aiꞌ Eerotiꞌke teni ninka Erodiasi, baaraꞌmaꞌnung Pilipiꞌ baꞌaang ninka otoresioꞌ Joonie tero aaꞌpuuꞌ, “Teeꞌ botoi potevui otoinaꞌ nkoraring teni nampera.” 5 Eerotiꞌke Jooni tee dupisiꞌkoo piavouꞌ, teka nantoong-koo avorouꞌ teinge tee nakaronung noruꞌai otoromanooꞌkoo. 6 Teketa niiꞌnaꞌmung tee, tee Eerotiꞌ bakaang doong pontoꞌaruꞌnaꞌmung-koo teni eeꞌnani Erodiasi baurang damisimainku-ankoi neekavarara Eerotiꞌ aaꞌnaꞌ karaaꞌantavuuꞌ. 7 Bera teie marakavarama teni kapooꞌ piavora eentavarako avuuꞌnaang tampuuꞌ. 8 Teketa baukoi botovuko tenie aaꞌpuuꞌ, “Jooni tee Minkinara-koong boreꞌ aꞌ daara-koo siꞌmemura ameaing.” 9 Teketa teie dauraronge~ teeꞌ taaravura domang orakaꞌ deeꞌouꞌ, teka tee bakaang maraka-anta nkovuuꞌnung deemparako eeꞌnoko napoꞌ teing damisimainku otoroko, tee botoaruꞌ teni avuꞌkoo teeꞌ eentavaruꞌnaꞌ. 10 Eeꞌnoko botoarioꞌ bakaning-koo narung bera pava kiimatanavaꞌkoo kuunga kuru takoꞌpevuuꞌ. 11 Eeꞌnoko Jooni bakaang boreꞌ daara-koo nkavui pora teni neraiꞌnaꞌ avuuꞌ. Eeꞌnoko tenie bauko-anko tavoꞌuuꞌ. 12 Eeꞌnoko Jooni bakaning barevare-nupoonge porora bakaang mono nkavaara dakoꞌauꞌ. Teketa Jiisuuꞌanko berora nauauꞌ tee.

Jiisuuꞌke Nantoong Paꞌnokoꞌ Kokoreiꞌ Divuꞌ Bauꞌuruꞌnaꞌ

(Mak 6:31-44; Luk 9:10-17; Jon 6:1-13)

13 Tenang Jiisuuꞌke taaravura tee kapooꞌ Jooni Minkinara-koo nkoaruꞌnung, teketa tenkenuuꞌnung eeꞌnoko bakaasi-koo bakaning ninka aaꞌearira biiꞌka otoꞌnooꞌ berouꞌ. Teeꞌ taaravaara nantoong karingai siompai kauꞌke berouꞌ osinanka-ita. 14 Tenang Jiisuuꞌ bakaning ninka teꞌ duumearira~ teka nantoonanka mmauꞌ karinga oovurira bakaang domang aaꞌnaꞌ piaavouꞌ teing-koo, eeꞌnoko siipa-nupoong poꞌantavaaruꞌning taare-antavuruꞌ. 15 Teketa muung-aapevuma nanuuꞌnang teinge bakaning barevare-nupoonge tee-anko porora aaꞌpauꞌ tee, “Niiꞌ meeꞌboraꞌ sirakamaaꞌkoo oꞌnoring eeꞌnoko batei nanuinge. Aing nantoong karikaꞌ botoveriko osinanka-koo berora taamang mooꞌsiiaavai.” 16 Jiisuuꞌke makuꞌurima aaꞌpuruꞌ, “Aing aaꞌ tokoi bataꞌkoo tampaꞌ deeaꞌ niiꞌ apukaꞌmariaꞌ. Diiꞌke kapooꞌ averereriko naiaavaing.” 17 Eeꞌnoko teinge makuꞌaama aaꞌpauꞌ, “Niiꞌ anke bereteꞌ paꞌnokoꞌ naing otong eeꞌnoko taviꞌ keura otoꞌmemurimaang.” 18 Jiisuuꞌke aaꞌpuruꞌ, “Aꞌ ning-anko poꞌantaveriaing teing.” 19 Eeꞌnoko teie nantoong karinga karaasiꞌkoo doonko baꞌnampariiꞌnaang botovuruꞌ. Eeꞌnoko Jiisuuꞌke teing paꞌnokoꞌ bereteꞌ eeꞌnoko taviꞌning keura nkavura tee paning-aape ankamparara biraankevura pisiꞌuuꞌ teing bereteꞌning. Teketa teing bakaning barevare-nupoong avuriko teinge teing karinga avaaruꞌ. 20 Eeꞌnoko ookara taamanaara poovorouꞌ. Eeꞌnoko teinge bakaning barevare-nupoonge kakitaꞌnanka oosiaara kivora-ita kevekuꞌka pekuꞌ maantoꞌantavauꞌ siparuꞌninge. 21 Nantoong donkaang teke taamanauꞌning-koong deerunooꞌ paꞌnokoꞌ kokoreiꞌ, manikuꞌ eeꞌnoko toireꞌ nariꞌ deeruariaꞌ.

Jiisuuꞌ Ntong-koo Daue Nanuuꞌnaꞌ

(Mak 6:45-56; Jon 6:16-21)

22 Teketa tenang namuꞌke Jiisuuꞌke bakaning barevare-nupoong bakaasi-nareng-koo aaꞌe-antavurira nuaruꞌkoo niiꞌnavete-koo beꞌkoo botovuruꞌ tee-koo uroꞌke, teing beroko nantoong karinga tenkeng-koo botovuriiꞌnaang. 23 Teketa Jiisuuꞌke teing karinga botovurira tee mii-koo deto baka beuꞌ teke kunsiaraaꞌnaang, bera muumpuuꞌ teke baka otoko. 24 Eeꞌnoko tereng bakaasi-nareng tee kansiꞌketa isipoꞌ basiaruꞌ, teka pionge kosiꞌuko booꞌai aaꞌnaꞌ neekavukoꞌ. 25 Bera taneꞌ dereꞌuaruko Jiisuuꞌ teing-aape pouꞌ nuaruꞌkoo daue nanuma. 26 Teketa teinge barevare-nupoonge ooaara ntong-koo daue nanuko, aaꞌnaꞌ avoreaama bokiaama aaꞌpaakoꞌ, “Aunkapeto maꞌnaang!” 27 Teka Jiisuuꞌke namuꞌke karavuruꞌ teing, aaꞌpurima, “Domang kuaaꞌdoriai aroreriaꞌ, tee ning eeꞌ nanamang.”

28 Teketa Piitai aaꞌpuuꞌ, “Ovoring, daꞌ masikung deekoꞌ bokumeko ning ntong-koo daue nanama daꞌanko meai.” 29 Jiisuuꞌke aaꞌpuuꞌ, “Poaing.” Teketa tenang Piita doonko siaruꞌ bakaasi-eta, eeꞌnoko ntong-koo daue nanuuꞌ Jiisuuꞌanko bema. 30 Teka tenang teie doving oovura tee avorouꞌ, eeꞌnoko minki tutumparuꞌ, eeꞌnoko minki tutumparama bokuma aaꞌpuuꞌ, “Ovoring, mooꞌmeai!” 31 Teketa namuꞌke Jiisuuꞌke tankaꞌ toonura mooꞌura aaꞌpuuꞌ tee, “Daꞌ bakei dakaang masikaꞌanta okiꞌnung. Aming-koo keekooꞌdaramaunge?” 32 Eeꞌnoko tenang bakaasi-koo deto aaꞌearesioꞌ tee doving bakearuꞌ. 33 Eeꞌnoko tenang teinge bakaasi-koo otorouꞌninge tee-anko kinkinaara daangampaama aaꞌpauꞌ, “Daꞌ tee Kumponing bauring masikung!”

34 Teketa kato pakoꞌarira Kenaseretiꞌnameng-koo tavoꞌariruꞌ. 35 Eeꞌnoko tenang nantoonge Jiisuuꞌ teka tasiꞌpaara doorenang ootukunairue tevaro-koo nanuꞌantavauꞌ. Teketa nantoonge ookara biikaning siipa-poꞌnupoong Jiisuuꞌanko tavoꞌaaruꞌ. 36 Eeꞌnoko eentavarikoꞌ tamung bakaang mononopaꞌkoo kainuꞌ kompaama taarevorooꞌnaang. Eeꞌnoko teing ookara tee kompauꞌning tee taarevorouꞌ.